Nos grandinan mester accion urgente pa mehora nan cuido, entrada y conexion social

Den e ultimo añanan, bo ta mira hopi charla, foro, bishita y oportunidadnan pa saca potret cu nos adultonan mayor, pero e accionnan aki ta carece di un cos; solucion berdadero. E no ta secreto cu mayoria adulto mayor ta pasando den duro. E motibonan ta varia, y solucionnan tambe ta compleho, pero ta cuminsa na un manera di pensa integral pa soluciona e problema, y pensamento critico pa por logra pone un fundeshi riba cual por construi solucionnan.

Costo di bida y falta di entrada.

Ora tabata tin un surplus, gobierno a bai inmediatamente na faborece duna indexering na ambtenaarnan, y mi ta cuestiona e motibo pa esaki. Ta un grupo cu ta relativamente bon para compara cu otro gruponan den comunidad - manera e.o. pensionadonan - cu tin necesidad grandi pa ayudo. Bo ta mira aki cu e prioridadnan ta completamente bruha, y por argumenta cu ta tuma decision asina simplemente pa gana fabor politico.

Mirando pa Futuro, mester inmediatamente 1) ahusta e belastingvrijevoet, 2) subi e reparatietoeslag den un forma responsabel, y 3) priorisa cu adultonan mayor no mester paga pa nan remedi. Tur ta accionnan cu mester a ser tuma caba, pero a carece di boluntad politico di e mandatario encarga pa bringa pa loke ta corecto.

Mobilidad y falta di transporte ta un obstaculo importante pa soluciona.

Esnan cu limitacionnan di mobilidad specialmente ta completamente isola for di comunidad, y ta depende riba famia, amistad, of transporte priva pa lo basico di sobrevivencia. Pa bay supermercado, pa bay dokter, pa bay botica, y sin lubida riba actividadnan social. Ki calidad di bida un adulto mayor tin e ora? Mobilidad ta esencial pa yuda nos grandinan sigui participa socialmente den nos comunidad.

Ta un cartera cu ta cay bou di e mesun mandatario, cu ta carece completamente di un vision integral pa crea solucionnan berdadero. Ta papia di a "rescata Arubus", pero a simplemente tira placa aden pa paga debe, pero na ningun momento no a reforma nos transporte publico, ni e rutanan, ni accesibilidad, cu por bisa cu a crea un solucion berdadero.

No tin suficiente centronan di cuido y pasadia. 

Gobierno no tin e fondonan pa construi nan, y tampoco e ta un negoshi cu hopi empresario ta escohe pa bay aden. Pues sin intervencion di gobierno, nunca no ta bai logra crea suficiente.

Con gobierno por hacie mas faborabel pa empresarionan inverti den e industria aki? Pa nan por prospera como negoshi, y tin suficiente fondo pa paga nan empleadonan un salario digno, cu mas studiante tambe por considera esaki un profesion cu nan lo kier explora. Na mes memento pa hacie mas barata y accessibel tambe pa e adulto mayor por yega na remarca.

Mesun manera cu a incentiva pa hotelnan inverti den Aruba despues cu Lago a cera, via tax-holiday, mester considera centronan di cuido como un prioridad pa incentiva den tur forma posibel. Entre otro por pensa riba haci e negoshi winstbelastingvrij, BBO/BAZV vrij, y tambe por considera elimina invoerrechten pa cama medico y tur muebleria necesario pa establece y modernisa nos centronan di cuido y pasadia. Tanten cu nos no tuma e pasonan drastico aki, y para firme pa crea solucionnan berdadero, nos lo ta papiando di e mesun retonan aki proximo eleccion un bes mas.

Crea mas departamento, of bin cu un bellijn (#125) pa adulto mayor ta leuk, pero no ta bay crea solucion pa e problemanan pa cual e persona ta yama keha p'e. Solucion berdadero ta cuminsa na accionnan integral cu tin efecto directo. Esey nos mester bayendo pa Futuro. Esey ta loke ami - Jeremy Erasmus - y partido Futuro ta para p'e.